40 ára afmælisráðstefna

Sjúkrarekstur SÁÁ er orðinn stór og veigamikill hluti í heilbrigðis- og velferðarþjónustu landsmanna. Starfsemin á sjúkrahúsinu Vogi er ómissandi hluti af sjúkrahúsþjónustunni í Reykjavík og starfsemin á göngudeildum SÁÁ og eftirmeðferðarstöðvunum Vík og Staðarfelli er hluti af almennri heilsugæslu, endurhæfingu og félagslegri aðstoð sem veitt er á Íslandi. Starfsemin er undir faglegu eftirliti Landlæknisembættisins og reksturinn undir eftirliti Sjúkratrygginga Íslands.

Meðferðin fer fram á Sjúkrahúsinu Vogi, endurhæfingarstöðvum og göngudeild. Þjónustan er alhliða og getur verið mjög mismunandi, allt frá stuttu viðtali til langrar meðferðar. Á fjórum áratugum hefur meðferðarstarfið tekið margvíslegum breytingum, umfangið hefur aukist verulega og meðferðin hefur verið aðlöguð þörfum skjólstæðinganna. SÁÁ veitir einnig viðamikla og kostnaðarsama viðhaldsmeðferð fyrir sjúklinga sem háðir eru ópíóíðum og fer sú meðferð fram á göngudeild á Vogi. Nánar >>

Sjúkrarekstur SÁÁ er fjármagnaður með þjónustusamningum við íslenska ríkið og tekjum af þeim gjöldum sem sjúklingar greiða fyrir þjónustu SÁÁ. Halli hefur verið af þessum rekstri en hann hefur verið greiddur upp af samtökunum með því fé sem félagsmenn og velunnarar samtakanna láta af hendi rakna með félagsgjöldum, þátttöku í fjáröflunarverkefnnum eins og álfasölunni eða á annan hátt. Vinir og velunnarar hafa einnig greitt fyrir byggingaframkvæmdir en um þessar mundir er verið að leggja lokahönd á nýja og glæsilega meðferðarstöð á Vík. Nánar >>

Í upphafi var SÁÁ draumsýn nokkurra hugsjónarmanna. Með vaxandi þekkingu hefur meðferðin þróast en grunnurinn er ætíð sá sami. Við erum hugsjónafólk og við látum okkur dreyma. Okkur dreymir um fyrsta flokks aðstöðu og aðbúnað fyrir fólkið okkar. Okkur langar til að geta boðið ungu fólki upp á langtímameðferð. Við viljum áfangahús fyrir ungar einstæðar mæður. Við viljum reisa gróðurhús á landi SÁÁ á Kjalarnesi þar sem fólk á batavegi getur ræktað eigið grænmeti, krydd og jafnvel ávexti. Við viljum auka þjónustu við börn og ungmenni. Okkur dreymir um betri eftirfylgni, félagslegan stuđning o.fl. Við getum litið stolt um öxl. Við viljum horfa fram á við og gera betur.

Takk allir fyrir stuðninginn við SÁÁ í 40 ár!

Við hlökkum til að sjá þig á 40 ára afmælisráðstefnu SÁÁ!